امام جعفر صادق علیہ السلام کی نصیحتیں

مؤلف: حجت السلام والمسلمین علی عباس حمیدی
ابان بن تغلب کابیان ہے کہ میں نے امام جعفرصادق علیہ السلام سے دریافت کیا:
’’کونسی چیزانسان میں ایمان کوثابت رکھتی ہے ؟‘‘
امام علیہ السلام نے فرمایا:
’’انسان میں ایمان کوثابت رکھنے والی چیز’’پرہیزگاری‘‘ہے ۔اورانسان سے ایمان کونکال دینے والی چیز’’لالچ‘‘ہے ۔
امام علیہ السلام نے حمادسے فرمایا:
’’اگر توچاہتا ہے کہ تیری آنکھیں روشن ہوں (تجھے خوشی حاصل ہو) اوردنیاوآخرت کی بھلائی میسر ہوتوجوکچھ لوگوں کے ہاتھ میں ہے اس کالالچ نہ کراور خود کو مردوں میں شمارکر، دل میں یہ نہ کہہ کہ تو لوگوں میں سے کسی سے بلند مرتبہ ہے اوراپنی زبان کی حفاظت کرجس طرح اپنے مال کی حفاظت کرتا ہے‘‘۔
عمروبن سعید ثقفی سے منقول ہے کہ میں نے امام جعفرصادق علیہ السلام سے عرض کی کہ
’’میں ہمیشہ آپ کی زیارت سے مشرف نہیں ہو سکتا لہذاآپ مجھے ایسی تعلیم فرمائیں کہ جس پرعمل پیرا ہوکر میں کامیابی سے ہمکنارہوجاؤں ‘‘۔
امام علیہ السلام نے فرمایا:
’’میں تجھے اﷲسے ڈرنے ، پرہیزگاری اختیارنے اورنیکیوں کے انجام دینے کی وصیت کرتا ہوں ۔تمہیں معلوم ہونا چاہئے کہ نیکیوں کے انجام دینے کا اس وقت تک کوئی فائدہ نہیں جب تک پرہیزگاری اس کے ساتھ نہ ہو‘‘۔
امام جعفرصادق علیہ السلام نے وصیت کی خواہش رکھنے والے ایک شخص سے فرمایا:
’’سفرآخرت کے لئے زادِراہ اکٹھا کرو۔اورجانے سے پہلے اسے بھیج دو تاکہ تمہیں مرتے وقت دوسروں سے التماس اوروصیت نہ کرنی پڑ ے کہ وہ بعد میں تمہارے لئے یہ زاد راہ بھیج دیں”۔
Source: http://alhassanain.org/urdu